ଆମ ଘର (ଏଇ ଘରଟିରେ ଜନମ ମୋର) - Aama Ghara (Ei Gharatire Janama Mora) Lyrics

ଗୀତ : ଏଇ ଘରଟିରେ ଜନମ ମୋର
ଭାଷା : ଓଡ଼ିଆ
ଗୀତିକାର : ନନ୍ଦକିଶୋର ସାମଲ


ଏଇ ଘରଟିରେ ଜନମ ମୋର
ଝାଟିମାଟିର ଏ, ନଡ଼ା ଛପର
ଏଇ ଘରେ ଆମେ
ଏକାଠି ଥାଉ,
ଏକାଠି ଖାଉ,
ଏକାଠି ବସୁ,   
ଏକାଠି ହସୁ ,
ବୁଢ଼ୀମା' ପାଶେ,
ଗପ ଶୁଣୁ ଶୁଣୁ ନିଦଟି ଆସେ ॥୧॥ 


ଏଇଟି ଆମର ରୋଷେଇ ଘର
ଏ ଘର ଭିତର ସଫାସୁତର
ଏଇଠାରେ ମାଆ
ପରିବା କାଟେ,
ବେସର ବାଟେ,
ଜାଇ ରଗଡ଼େ,
ଶାଗ ଖରଡ଼େ,
ଗଢ଼ଇ ପିଠା,  
ଆରସା, କାକରା, ଆଃ କି ମିଠା ! ॥୨॥ 


ଏଇଟି ଆମର ଫୁଲ ବଗିଚା
ତଳେ ପାଡ଼ିଛି କି ଘାସ ଗାଲିଚା
ଉଡ଼ି ଉଡ଼ି ଆସେ
ପରଜାପତି,
ତରକା ଅତି,
ଏଇଠି ବୁଲେ,
ଫୁଲରେ ଝୁଲେ,
କଳସୀ ଆଣି,
ଫୁଲ ଗଛ ମୂଳେ ଦିଏ ମୁଁ ପାଣି ॥୩॥


ଏଇଟି ମୋହର ପଢ଼ିବା ଘର
ସଜାଇ ରଖେ ମୁଁ ବହିପତର
ଏଇ ଘରେ ନିତି
ମନ ହରଷେ,
ଗଣିତ କଷେ,
ମୋ ବହି ପଢ଼େ,
ଖେଳଣା ଗଢ଼େ,
ଧରେ ମୁଁ ତୂଳୀ,
ଛବି କରେ ବସି ଭଳିକି ଭଳି ॥୪॥  


ଏଇଟି ଆମର ଟିକି ଗଡ଼ିଆ
ଥିରି ପାଣି ତା’ର କେତେ ବଢ଼ିଆ !
କେତେ ଗଛ ଛାଇ
ଆଲୁଅ ଦିଶେ,
ପାଣିରେ ମିଶେ,
ବଗୁଲି ଆସେ,
କୂଳରେ ବସେ,
ଗଡ଼ିଶାଟିଏ,
ଚମକି ଡିଏଁ,
ଥାଏ ମୁଁ ଥାଏଁ,
ତାଳିଟାଏ ମାରି ପାଣିକି ଡିଏଁ
ଏ କୂଳୁ ସେକୂଳ ପହଁରିଯାଏ ॥୫॥


ଏଣିକି ଏ ଘର ବଦଳିଯିବ
ଝାଟିମାଟି ରୂପ ଆଉ ନଥିବ
ଆମ ହାତେ ଯିବ
ଛାତ ପାଲଟି,
ଏଇ ଚାଳଟି,
ନିଆଁ ପାଣିର,
ତୁଟିବ ଡର,
ବିଜୁଳିବତୀ,
ଘରକୁ କରିବ ଉଜଳ ଅତି ॥୬॥


Note:
ମୂଳ ଲେଖାଟିକୁ ଏଇଠି ସ୍ଥାନ ଦିଆଯାଇଛି । ସମୟକ୍ରମେ ଏହି ଗୀତଟିକୁ ଟିକେ ବଦଳାଯାଇଛି ବହିରେ ।

ବଦଳା ଯାଇଥିବା ପଦ ସବୁ ଏମିତି:
"ଏଇ ଘରଟିରେ ଜନମ ମୋର, ଘର ନୁହେଁ ଇଏ ସରଗପୁର"
"ଏଇଟି ଆମର ରୋଷେଇ ଘର, ରଖିବା ତାହାକୁ ସଫାସୁତର"


ଆପଣଙ୍କ ମତାମତ ବା ପ୍ରଶ୍ନ ତଳେ comment କରି ଜଣାନ୍ତୁ...