ବୃଦ୍ଧାଶ୍ରମ୍ ସମ୍ବଲପୁରୀ କବିତା - Bruddhashram Sambalpuri Kabita Lyrics
ଗୀତ : ବୃଦ୍ଧାଶ୍ରମ୍
ଭାଷା : ସମ୍ବଲପୁରୀ
ଗୀତିକାର : କରୁଣାକର ଛତର
ମସିହା : ୨୦୧୯
ବାପା:
କେଡ଼େ ଲାଡ଼େଗେଲେ ପୁଷଲୁଁ ବାବୁରେ
ଛୁଆ ଟେ ନୁ କଲୁଁ ବଡ଼୍
ଆଏଜ୍ ଆମେ ହେଲୁଁ ଫିକଲା ସାଜୋ
ଘାଏକେ କଲୁ ରେ ପର୍ ॥୧॥
ମାଆ:
ଦଶ୍ ମାସ୍ ତତେ ଗର୍ଭେ ଧରି ରେ
ଜନମ୍ କଲି ଧନ ମୋର୍
ଇ ଦିନ୍ ତୋର୍ ବୁଆ କେ ଆଉ ମତେ
ଦେଖାବାର୍ ଥିଲା ତୋର୍ ॥୨॥
ବାପା:
ଇ ଖନେ ତତେ ବସେଇ ବାବୁରେ
ଯାତରା ଦେଖାଲି କେତେ
ଜୀବନର୍ ଶେଷ୍ ଯାତରା ବେଲକେ
ଘରୁ ଖେଦିନେଲୁ ମତେ ॥୩॥
ମାଆ:
କାନିପନତ୍ ମୋର୍ ସାକ୍ଷୀ ରେ ପୁଓ
ଇଥି ପୁଛୁଥିଲୁ ମୁହୁଁ
ଇ କାନିପନତ୍ ଖୁଜବା ତତେ ରେ
ହେଲେ ସେ ପାଏବା କାହୁଁ ॥୪॥
ବାପା:
କେତେ ଖେଲୁଥିଲୁ ଖେଲନା ଗା ବାବୁ
ଖେଲ୍ ଦେଖାଲୁ ଗା ଆଏଜ୍
କାହାକେ କହେସି ମୋର୍ ପୁଓ ବଲି
ମତେ ତ ଲାଗୁଛେ ଲାଏଜ୍ ॥୫॥
ମାଆ:
ପାଇ କରି କରି ଜନ୍ କେ ଦେଖେଇ
ଦାଏଲ୍ ଭାତ୍ ସାନି ସାନି
ଖୁଏଇଥିଲି ରେ ସୁନା ଧନ ମୋର୍
ଶୁଇଥିଲୁ ଗୀତ୍ ଶୁନି ॥୬॥
ବାପା:
ଜର୍ ଆନୁଥିଲେ ମୁଡ୍ ଆଡେ ବସି
ତୋର୍ ମାଆ ଆଉ ମୁଇଁ
ରାଏତ୍ ସାରା ଚେତି ମୁଡ୍ ତୋର୍ ଟାମଡ଼ି
ଶୁଇଯାଉଥିଲୁଁ ଭୁଇଁ ॥୭॥
ମାଆ:
ନାଇ ମାଗି ତତେ ତୋର୍ ଘରେ ପୁଓ
ସୁନାରୁପା ମୋତି ହୀରା
ମଲା କାଲ୍ କେ ଥିପେ ତୁରେନ୍ ସାଙ୍ଗେ
ଦେଇଥିତୁ ଭାତ୍ ଦିରା ॥୮॥
ବାପା:
ଦେଖ୍ ବେଟା ତୁଇ ତର୍କି ଥାଆରେ
ନାଇ ଆସୁ ଏନ୍ତା ଦିନ୍
ନାଇ କରୁ କେଭେ ଉପର ବାଲା
ଆମର୍ ବାଗିର୍ ତତେ ହୀନ୍ ॥୯॥
ମାଆ:
ଚକ୍ ଖଡି ଧରି ପହେଲା କରି
ଶିଖାଲି ରେ ଅ ଆ
କେତେ ପଢିନେଲୁ ଜ୍ଞାନ୍ ପାଇ ଗଲୁ
ମତେ ତୁଇ କହେଲୁ ଯା ॥୧୦॥
ବାପା:
ଶେଷେଁ ତତେ ଖାଲି ଏତ୍କି ଗୁହାରୀ
ନାଇ ଆଏବୁ କେଭେ ଦେଖି
ଆମର୍ ଭାଗ୍ୟ ତ ବୃଦ୍ଧାଶ୍ରମ୍ ଥି
ଦେଲୁରେ ପୁଓ ଲେଖି
ତୁଇ
ଦେଲୁରେ ପୁଓ ଲେଖି ॥୧୧॥
ଶବ୍ଦାର୍ଥ
ଲାଡ଼େଗେଲେ= ସ୍ନେହରେ, ପୁଷଲୁଁ= ପୋଷିଲୁ, ଆଏଜ୍= ଆଜି, ଫିକଲା= ଫିକା, ସାଜୋ= ଜିନିଷ, ଦ୍ରବ୍ୟ, ଘାଏକେ= ତତ୍କ୍ଷଣାତ୍, ଠିକ୍ ସେଇ ମୁହୂର୍ତ୍ତରେ, ବୁଆ= ବାପା, ଖନେ= କାଖରେ, କାନିପନତ୍= କାନି ପଣତ, ଇଥି= ଏଥିରେ, ଖୁଜବା= ଖୋଜିବ, ଖେଲନା ଗା= ଖେଳଣା ସବୁ, କହେସି= କହିଲେ, ଦାଏଲ୍= ଡାଲି, ସାନି ସାନି= ମିଶେଇ, ଆନୁଥିଲେ= ଆସୁଥିଲେ, ରାଏତ୍= ରାତି, ଚେତି= ଚାହିଁ ରହି, ଟାମଡ଼ି= ଜାବୁଡ଼ି ଧରି, ଥିପେ= ଟିକିଏ, ତୁରେନ୍= ତୋରାଣି, ତର୍କି= ସତର୍କ ହୋଇ, ବାଗିର୍= ଭଳି, ପହେଲା= ପ୍ରଥମ କରି, ଶିଖାଲି= ଶିଖାଇଲି, କହେଲୁ= କହିଲୁ, ଶେଷେଁ= ଶେଷରେ, ଆଏବୁ= ଆସିବୁ, କେଭେ= କେତେବେଳେ, ବୃଦ୍ଧାଶ୍ରମ୍ ଥି= ବୃଦ୍ଧାଶ୍ରମ ରେ
ଫଟୋ କ୍ରେଡିଟ୍ : ଶ୍ରୀ କରୁଣାକର ଛତର
ଆପଣଙ୍କ ମତାମତ ବା ପ୍ରଶ୍ନ ତଳେ comment କରି ଜଣାନ୍ତୁ...
Comments
Post a Comment
ଆପଣଙ୍କ ବହୁମୂଲ୍ୟ ମତାମତ ଅପେକ୍ଷାରେ...