ବାପାଙ୍କୁ ଚିଠି - Bapanku Chithi Odia Kabita
କବିତା: ବାପାଙ୍କୁ ଚିଠି
ଭାଷା: ଓଡ଼ିଆ
ଗୀତିକାର: ସ୍ନିଗ୍ଧା ଦାସ (କ୍ରିଷ୍ଣା)
ବାପା,
କେଉଁ ଉପାଦାନରେ ଗଢ଼ା ତୁମେ
କେତେ ଉଦାର ଶାନ୍ତ ସଂଭ୍ରମ
ଅସୀମ ଧୈର୍ଯ୍ୟ, ନିରୀହ ମନ
ସତରେ, କେଉଁ ଉପାଦାନରେ ଗଢ଼ା ତୁମେ ॥
ତୁମର କ୍ଳାନ୍ତ ମୁହଁ
ଦେଖିଛି ଛାର ଅନ୍ଧାରରେ
ସ୍କୁଲରୁ ଫେରିଲା ପରେ
ଦେଖିଛି କପାଳରୁ ଗଡ଼ୁଥିବା
ସେଇ ଟୋପା ଟୋପା ଝାଳ ବୁନ୍ଦା
ରାତିର ଅନ୍ଧାର ଭିତରେ
ନିଦୁଆ ଆଖିରେ
ଦେଖିଛି କେମିତି ଡ଼ାକୁଥିଲ
ଠାକୁରଙ୍କ ପାଖରେ
ତୁମ ବାଲିଘର ଅକାଳରେ
ଭାଙ୍ଗି ନଯିବା ଆଶାରେ ॥
ବାପା, ତୋଳିଥିବା ଘରଟି,
ସ୍ଵପ୍ନର ଘର ପରି ହେଲାକି ନାହିଁ
କେବେ ପଚାରି ବୁଝି ନାହିଁ
ହେଲେ, ତୁମେ ଏମିତି ଜଳି ଜଳି
ସବୁ ସୁଖ ଫିଙ୍ଗିଦେଇ
ରକ୍ତକୁ ପାଣି କରି
କ'ଣ ପାଇଲ ଜୀବନରେ
ବେଳେ ବେଳେ ମନକୁ ପଚାରେ ॥
ସତରେ, କ'ଣ ସବୁ ବାପା ଏମିତି
ଏକା ଏକା ଆଖିକୁ ଲୁହରେ ଭିଜାନ୍ତି
ଆଉ ସଭିଙ୍କୁ ହସି ହସି କୁହନ୍ତି
ମୋ ପିଲା ସବୁ ସୁନା ମୁଣ୍ଡା
ମୋ ରକ୍ତରୁ ଗଢ଼ା
ସେଥି ପାଇଁ ତ ଅମଣିଷ ନୁହଁନ୍ତି ॥
ସବୁ ବାପମାନେ ଯୁଗ ଯୁଗରେ
ଏମିତି ଚାଲନ୍ତି ଅମଡ଼ା ରାସ୍ତାରେ
ହାର ମାନନ୍ତି ନିଜ ସୃଷ୍ଟି ଠୁଁ
ଆଉ ଲହୁ ଲୁହାଣ ହୁଅନ୍ତି
ଜୀବନର ଅପରାହ୍ନରେ ॥
ଆପଣଙ୍କ ମତାମତ ବା ପ୍ରଶ୍ନ ତଳେ comment କରି ଜଣାନ୍ତୁ..
Comments
Post a Comment
ଆପଣଙ୍କ ବହୁମୂଲ୍ୟ ମତାମତ ଅପେକ୍ଷାରେ...