ଭାସିଯାଆ ମୋର କାଗଜ ଡଙ୍ଗା ଭାସିଯାଆ - Bhasija Mora Kagaja Danga Bhasija Lyrics
== ଓଡ଼ିଆ ==
ଗୀତ : ଭାସିଯାଆ ମୋର କାଗଜ ଡଙ୍ଗା ଭାସିଯାଆ
ଭାଷା : ଓଡ଼ିଆ
ଗୀତିକାର : ସ୍ଵର୍ଣ୍ଣପ୍ରଭା ଦେବୀ
ଭାସିଯାଆ ମୋର
କାଗଜ ଡଙ୍ଗା ଭାସିଯାଆ
ଘୋଟି ଆସିଲାଣି
ଆକାଶରେ ଘୋର ମେଘ ବାଆ ॥୧॥
ପବନ ବହୁଛି
ଝିପିଝିପି ମେଘ ବରଷଇ
ବିଜୁଳି ଚମକେ
ଘଡ଼ଘଡ଼ି ଡାକେ ରହି ରହି ॥୨॥
କେତେ ମଜାଲାଗେ
ଓଳିରୁ ବରଷା ପଡ଼େ ଝରି
ଫୁଟି ଭାସିଯାଏ
ପାଣିରେ ଫୋଟକା ଅସୁମାରି ॥୩॥
ଭାସିଯାଆ ମୋର
କାଗଜ ଡଙ୍ଗା ଭାସିଯାଆ
ଡରିଯିବୁ ନାହିଁ
ଆକାଶରେ ଦେଖି ମେଘ ବାଆ ॥୪॥
ଝୁଲି ଝୁଲି ତୁହି
ଦୂରକୁ ଦୂରକୁ ଯାଆ ଭାସି
ଡଙ୍ଗାରେ ! ତୋତେ
ମେଲାଣି ଦେଲି ମୁଁ ହସି ହସି ॥୫॥
ଡର ନାହିଁ ଯାଆ
ଆଗେଇ ଯାଆ ତୁ ସୁଅଧାରେ
ଥମିଲେ ବରଷା
ଯାଇପାରିବୁ ତୁ ଆଉ କି'ରେ ? ॥୬॥
ଶୁଣିଥିଲି ଥରେ
କହୁଥିଲେ ଆଈ ମୋର ପାଶେ
ଚାଲିଥିଲା ଆମ
ବଣିଜବେପାର ଦୂର ଦେଶେ ॥୭॥
କାର୍ତ୍ତିକ ମାସେ
ବୋଇତା ମେଲାଇ ଦରିଆରେ
ସାଧବେ ଆମର
ଯାଉଥିଲେ ଦୂର ଦେଶ ପାରେ ॥୮॥
ଝଡ଼ ତୋଫାନକୁ
ନ ଥିଲା ତାଙ୍କର ତିଳେ ଡର
ଫେରି ଆସୁଥିଲେ
ଆଷାଢ଼ରେ ସାରି କାରବାର ॥୯॥
ଆଣୁଥିଲେ ଧନ
ଦରବ ସାଧବେ କେତେ ବୋହି
ଜାଭା ବୋରନିଓ
ସିଂହଳ ବାଲି ଦ୍ଵୀପେ ଯାଇ ॥୧୦॥
ବୋଇତରେ ଭରି
ଧନ ଦଉଲତ ହୋଇ ଖୁସି
ଫେରୁଥିଲେ ଘରେ
ଦରିଆପାରିରୁ ମିଳିମିଶି ॥୧୧॥
ବୋଇତ ମଙ୍ଗେ
ଶୁଭ ନାରିକେଳ ଜଳ ଢ଼ାଳି
ଝିଅ ବୋହୂ ମିଶି
ବନ୍ଦାଉଥିଲେ ଦୀପ ଜାଳି ॥୧୨॥
ଯାଇଛି ସେକାଳ
ଆସିଛିରେ ଏବେ ନୂଆ ବେଳା
ନୀଳ ପାରାବାରେ
ଚାଲଇ ଜାହାଜ ଭେଳା ଭେଳା ॥୧୩॥
ବନ୍ଦର କେଡ଼େ
ତିଆରି ହେଲାଣି ପାରାଦଦ୍ଵୀପେ
ବଣିଜ ବେପାର
ବଢ଼ିବ ଏଣିକି ନାନାରୂପେ ॥୧୪॥
ଅଟକିଗଲୁ କି
କଥା ମୋର ଶୁଣି ଯାଆ ଭାସି
ବିଦାୟ ଦେଉଛି
ତୋତେ ମୁହିଁ ଏବେ ହସି ହସି ॥୧୫॥
ଏଇ ହାତେ ତୋତେ
ଗଢ଼ିଛି ମୁଁ କେତେ ଭରସାରେ
ଖେଳିଛି ତୋ ସାଥେ
ଏହିପରି କେତେ ବରଷାରେ ॥୧୬॥
ଭାସିଯାଆ ମୋର
କାଗଜ ଡଙ୍ଗା ଭାସିଯାଆ
ବାଟଯାକ କେତେ
ନୂଆ ନୂଆ ସାଥୀ ଭେଟୁଥାଆ ॥୧୭॥
YouTube ରେ ଭାସିଯାଆ ମୋର କାଗଜ ଡଙ୍ଗା
ଭାସିଯାଆ ମୋର କାଗଜ ଡଙ୍ଗା ଭାସିଯାଆ:
ପାଠ୍ୟପୁସ୍ତକରୁ ସଙ୍ଗୃହିତ, ସ୍ଵର୍ଣ୍ଣପ୍ରଭା ଦେବୀ ଙ୍କ ରଚିତ କବିତା “ଭାସିଯାଆ ମୋର କାଗଜ ଡଙ୍ଗା ଭାସିଯାଆ” ପଢ଼ନ୍ତୁ “ଦି ସ୍ମରଣିକା” ରେ ଓଡ଼ିଆରେ ।
ଆପଣଙ୍କ ମତାମତ ବା ପ୍ରଶ୍ନ ତଳେ comment କରି ଜଣାନ୍ତୁ...
Which class this is odia sahitya kabita
ReplyDeleteClass III. Thank you for asking.
Delete- "The Smaranika" Team