ଜୀବନ ବାଟରେ - Jibana Batare Odia Kabita

ଗୀତ: ଜୀବନ ବାଟରେ

ଭାଷା: ଓଡ଼ିଆ 

ଗୀତିକାର: ସ୍ନିଗ୍ଧା ଦାସ (କ୍ରିଷ୍ଣା) 

ଜୀବନ ବାଟରେ ଚାଲିବାଟା କଷ୍ଟ 

          ନ ଥିଲେ ସାଥିଟେ କେହି,

ସାଥି ଟିଏ ଥିଲେ ଜୀବନ ଯାତନା

               ସବୁ ହୋଇଯାଏ ସହି ॥ ୧ ॥

ଭଲ ଅବା ମନ୍ଦ ଦୁଃଖ ଅବା ସୁଖ 

                  ବୁଢୀଆଣି ଜାଲ ପରି,

ଛନ୍ଦି ହୋଇଗଲେ ସେହି ମାୟା ଜାଲେ 

                  ଜୀବନଟା ଯାଏ ସରି ॥ ୨ ॥

ଚଗଲା ମନଟି ମହୁମାଛି ପରି 

                 ଗୁଣୁ ଗୁଣୁ ଗୀତ ଗାଏ,

କେବେ ପୁଣି ସିଏ ଫୁଲର ବାସରେ

                 ମତୁଆଲା ହୋଇଥାଏ ॥ ୩ ॥

କିଏ ଅବା ସେହି ମନର କୁସୁମ 

               ପ୍ରତୀକ୍ଷାଟି କାହା ପାଇଁ,

ହୃଦୟର ଏହି ବହଳ ଶୂନ୍ୟକୁ 

               କେବେ ମୁଁ ପଚାରି ନାହିଁ ॥ ୪ ॥

ମନକଥା ଖୋଲି କହି ପାରେ ନାହିଁ  

              ଚାହିଁଲେ ବି ଯେତେ ଥର,

ଅଡ଼ୁଆ ସୂତାରେ ଛନ୍ଦି ହୋଇଯାଏ 

              କଅଁଳ ମନଟି ମୋର ॥ ୫ ॥

ସଂସାର ସାଗର ମନ୍ଥନ କରିଲେ

             କେବେ ମିଳେ ପାରିଜାତ,

କେବେ ପୁଣି ମିଳେ ହଳାହଳ ବିଷ

            ଏକଥା ଜାଣିଥା ମିତ ॥ ୬ ॥

Photo: ଗୀତିକାର "କ୍ରିଷ୍ଣା " ପତିଙ୍କ ସହିତ


ଆପଣଙ୍କ ମତାମତ ବା ପ୍ରଶ୍ନ ତଳେ comment କରି ଜଣାନ୍ତୁ..