ସଭିଏଁ ଏକା ପରି (କିଏ ତ କଳା କିଏ ଗୋରା ହଳଦି ରଙ୍ଗ କିଏ) - Sabhien Eka Pari (Kie Ta Kala Kie Ta Gora Haladi Ranga Kie) Lyrics

ଏହି କବିତାଟିକୁ ଲେଖିବା ପାଇଁ "ଦି ସ୍ମରଣିକା" ର ଜଣେ ପାଠକ ୧୪ ମଇ ୨୦୨୧ ରେ ଅନୁରୋଧ କରିଥିଲେ । ଆପଣ ମଧ୍ୟ ଅନୁରୋଧ କରିପାରିବେ । ଯୋଗାଯୋଗ ପାଇଁ Contact ପେଜ୍ ଦେଖନ୍ତୁ ।

ଫଟୋ କ୍ରେଡିଟ୍ : ଉପର ଫଟୋଟି ଅନ୍‌ସ୍ପ୍ଲାସ୍‌ ରୁ ସଂଗୃହିତ


କିଏ ତ କଳା କିଏ ତ ଗୋରା
                ହଳଦୀ ରଙ୍ଗ କିଏ
କେଉଁ ପିଲାର ବାଦାମି ଦେହ
                ଗୋଲାପି ଦିଶେ କିଏ ॥୧॥
ରଙ୍ଗ ସିନା ଭଳିକି ଭଳି
                ଢଙ ଏକା ପରି
ପିଲାଏ ପରା ଦୁନିଆ ସାରା
                ସଭିଏଁ ଏକା ପରି ॥୨॥
ଖାଏ କେ ଭାତ ଖାଏ କେ ମାଛ
                ମାଉଁସ ଅବା ରୁଟି
ଖାଇବ କ୍ଷୀରି କରଇ ଅଳି
                ସକାଳୁ କିଏ ଉଠି ॥୩॥
ଆହାର ସିନା ଭଳିକି ଭଳି
                ସଭିଏଁ ଏକା ପରି
ହସିଲେ ପିଲା ରାଇଜ ସାରା
                ହସରେ ଯାଏ ଭରି ॥୪॥
କୁଡ଼ିଆ ଘରେ ରହେଟି କିଏ
                ରହେ କେ କୋଠା ଘରେ
ଗଛରେ କିଏ ତୋଳଇ ଘର
                କିଏ ବା ନାଆ ପରେ ॥୫॥
ଘରଟା ସିନା ଭଳିକି ଭଳି
                ରହଣି ଏକା ପରି
ସଭିଏଁ ପିଲା ସବୁରି ମୁହଁ
                କଅଁଳ କଢ଼ି ସରି ॥୬॥
ରବିନ୍ ଅବା ରୋହିତ କିଏ
                ରହିମ୍, ରାମ, ଶ୍ୟାମ
ଜାକ୍, ଜିଲ୍ ହୁଆଙ୍ଗ କିଏ
                ନାମରେ କେଉଁ କାମ ॥୭॥
ନାଆଁଟି ସିନା ଭଳିକି ଭଳି
                ଖେଳ ତ ଏକା ପରି
ଡିଆଁ ଡେଇଁରେ ନାଚ କୁଦରେ
                ମେଦିନୀ ଉଠେ ଥରି ॥୮॥
କେଉଁ ପିଲାର ରେଶମୀ ଜାମା
                ପଶମ ଜାମା କା'ର
ନାଇଚି କିଏ ଚଢ଼େଇଠାରୁ
                ଛଡ଼େଇ ଆଣି ପର ॥୯॥
କରିଚି କିଏ ପୋଷାକ ତା'ର
                ହରିଣ ଛାଲ ଚିରି
ପୋଷାକ ସିନା ଭଳିକି ଭଳି
                ପିଲା ତ ଏକା ପରି ॥୧୦॥
ଦୁନିଆ ଯାକ ପିଲାଏ ଆମେ
                ବସିବା ଆସ ମିତ
ହସି ହସିକା ନାଚି ନାଚିକା
                ଗାଇବା ଆମେ ଗୀତ ॥୧୧॥
ପର ଆପଣା ଭାବଟି ଭୁଲି
                ଚଳିଲେ ଏକା ପରି
ଏଇ ଭୁଇଁରେ ସରଗ ସୁଖ
                ପଡ଼ିବ ସିନା ଝରି ॥୧୨॥


YouTube ରେ ହସଭିଏଁ ଏକା ପରି



ସଭିଏଁ ଏକା ପରି (କିଏ ତ କଳା କିଏ ଗୋରା ହଳଦି ରଙ୍ଗ କିଏ):
ପାଠ୍ୟପୁସ୍ତକରୁ ସଙ୍ଗୃହୀତ କବିତା “ସଭିଏଁ ଏକା ପରି.. କିଏ ତ କଳା କିଏ ଗୋରା ହଳଦି ରଙ୍ଗ କିଏ..” ପଢ଼ନ୍ତୁ “ଦି ସ୍ମରଣିକା” ରେ ଓଡ଼ିଆରେ ।

Keywords: Pathyapustaka Kabita, Odia Textbook Poem, The Smaranika, Sabhien Eka Pari, Kie Ta Kala Kie Ta Gora Haladi Ranga Kie, Sabhien Ekapari, ପାଠ୍ୟପୁସ୍ତକ କବିତା, ଓଡ଼ିଆ ସାହିତ୍ୟ ବହି ଗୀତ, ଦି ସ୍ମରଣିକା, ସଭିଏଁ ଏକା ପରି, କିଏ ତ କଳା କିଏ ଗୋରା ହଳଦି ରଙ୍ଗ କିଏ, ସଭିଏଁ ଏକାପରି,

ଆପଣଙ୍କ ମତାମତ ବା ପ୍ରଶ୍ନ ତଳେ comment କରି ଜଣାନ୍ତୁ...